ЖГИ Антико и Центарот за истражување и креирање политики (ЦРПМ) на 9-ти февруари 2009-та година во НВО инфо-центарот организираa прес- конференција, каде што ги објавија резултатите на истражувањето во рамките на проектот "Мојот глас - моја одлука".

Политичките партии се главни виновници за семејното гласање – ова го покажува анализата на Центарот за истражување и креирање политики (ЦРПМ). Испитаниците вклучени во 14-те фокус групи истакнале дека преку групното гласање во руралните средини некои партии обезбедуваат сигурна победа. Од центарот велат оти проблемот дополнително го усложнува и неефикасноста на државните институции.

- Од сите 120 учесници во „фокус“ групите, ниту еден не слушнал за пример некој да биде казнет за семејно гласање или гласање во име на друг. Сметаат дека доколку ефикасно се спроведуваат казните на некој начин би се намалила оваа појава. Ретко кој од испитаниците слушнал претставник на избирачки одбор да опомене или да упати некој како правилно се гласа - вели м-р Сања Костовска, аналитичар.

Според Женската Граѓанската Иницијатива Антико, најранлива категорија е женската популација. Недозволувањето на жената слободно да го даде својот глас е отворена закана за развојот на демократијата, вели г-ѓа Ѓунер НЕБИУ од  ЖГИ Антико. „Семејното гласање и гласањето во име на друг е феномен кој стана видлив, по осамостојувањето на Македонија. Тоа секогаш беше актуелно, но во различни периоди, со различен интензитет - рече г-ѓа Ѓунер Небиу – претседателка на ЖГИ Антико“.

Во насока на спречување на оваа негативна појава, двете организации ќе ја започнат кампањата „Мојот глас – моја одлука“. По принципот од врата на врата ќе се делат промотивни материјали во изборните единици каде е евидентиран проблемот.