Европска Феминистика Иницијатива испрати апел со наслов Доста! до сите релевантни фактори низ целиот свет. ЖГИ Антико го поддржува апелот и им се приклучува на сите граѓански и феминистички движења кои бараат итна акција како одговор на овој страшен злочин.

ДОСТА!

„Најкрвавиот ден во Газа во 40 години, од крајот на шестдневната војна”. Речиси 300 убиени и 700 ранети досега, а ова е само почеток според израелските лидери. Денес цивилите во Газа се оставени сами пред масивно уништување, без храна, електрична енергија, лекови, без никаква врска со светот, во катастрофална нехумана положба. Повеќе од половина милион се колективно казнувани и се лишени од основните животни потреби за повеќе од една година.

Европската Феминистичка Иницијатива им се придружува на сите граѓански движења за човекови права и феминистички движења во итна акција во целиот свет како одговор на овој страшен злочин.

Милитантноста и насилството предизвикуваат насилство. Феминистките го знаат ова многу добро. Европската Феминистичка Иницијатива бара итно запирање на Израелското бомбардирање на Газа и на сите воени акции од страна на Израел и Хамас, и ги повикува двете страни да ги започнат мировните преговори. Потребен е итен прекин на економската блокада на Газа. Сега!

Исто така, ги повикуваме ЕУ и САД да преземат веднаш чекори кои ќе стават крај на вооружувањето и милитаризацијата на нивните општества и на сите општества во светот. ЕУ и САД имаат голема обврска да започнат процес на разоружување на глобално ниво, вклучувајќи го и расформирањето на НАТО, преку кој ќе се фацилитира целосното запирање на вооружувањето во Средниот Исток и отварањето на простор за партиципативно истражување на вистински мировни политички решенија, во кои цивилното општество, активистите за човекови права, мировните работници заедно со прогресивните политичари ќе имаат свој збор.

Резолуциите на ОН поврзани со повлекување на населбите и повлекување од окупираните палестински територии мораат да бидат итно спроведени. Израелските и палестинските влади треба итно да отворат простор за дијалог, дијалог кој ќе значи самокритички пристап и признавање на другиот.

Дијалог кој се базира на UNSCR 1325 и обезбедува простор за жените и феминистиките од цивилниот сектор од сите страни да седнат на преговарачката маса. Сега!

Lilian Halls-French

President of

European Feminist Initiative