ПОКАНА за учество во активности во рамки на Меѓународна Кампања „16 дена активизам против насилство врз жени и девојчиња“ под мотото „Стави крај на насилството врз жените и семејното насилство“

Почитувани,

Особена чест и задоволство ни е да ве поканиме на престојните активности кои АНТИКО ги организира во рамките на Кампањата „16 дена активизам за борба против насилството врз жените и девојчињата“. Во текот на 16 дена, организациите членови и соработниците на мрежата на АНТИКО ќе реализираат 17 настани – работилници и трибини, во 14 локални заедници на Република Македонија односно во Тетово, Гостивар, Ресен, Пробиштип, С.Будаково-Могила, Куманово, Липково, Јегуновце, Делчево, Кичево, Теарце, Шуто Оризари, С.Канатларци-Прилеп и Општина Аеродром. Покрај работилниците и трибините ќе се врши и дистрибуција на промотивно-едукативен материјал.

Целите на активностите на кампањата и на промотивно-едукативниот материјал се: да се даде придонесе кон зголемување на јавната свест и информираноста за мерките кои треба да се превземат во однос на проблемот на насилството врз жените и девојчиња, и семејното насилство на локално и национално ниво. Имено, наша главна цел е: да се овозможи превенирање на насилството и подобрување на заштитата на потенцијалните жртви, но и да се потсетат сите надлежни државни институции и други засегнати страни за потребата да се обезбеди нивно активно, организирано, координирано и ефикасно приклучување кон заложбите за елиминирање на сите форми на насилството врз жените и девојките, во согласност со „Законот за превенција, спречување и заштита од семејно насилство“ на Р. Македонија.

Активностите на кампањата се насочени кон сензибилизирање на младата популација од урбано и рурално поднебје и на претставниците на државните институции во насока на формирање позитивни ставови во однос на родовата рамноправност и еднаквите можности сѐ со цел елиминирање на родовите предрасуди и стереотипи кои создаваат “плодно тло” за одржување на насилството.

Со оваа кампања АНТИКО дава активен придонес кон создавањето на еден побезбеден свет и достоинствен живот без насилство и почитување на правата на секоја индивидуа. Поканата и деталната табела за овогодинешните настани и активности можете да најдете на овој линк http://antiko.org.mk/Uploads/ANTIKO_Pokana_za_kampanja_16_dena_aktivizam_2017_godina_Civica_INS_mak(1).pdf.

Со почит,

ЖЕНСКА ГРАЃАНСКА ИНИЦИЈАТИВА АНТИКО