Скопје, 01.08.2017 година 

ОТВОРЕНО ПИСМО

Женска граѓанска иницијатива АНТИКО – мрежа на граѓански организации за женски човекови права, најостро го осудува дискриминаторскиот пристап на организаторот на 31от Меѓународен Атлетски Маратон – Здружението Охридски Атлетски Маратон 2012, каде за исто истрчана патека, наградите помеѓу мажите и жените се драстично различни и варираат од 100-300 евра. Ова покажува дека дури и во услови на иста стартна позиција помеѓу жените и мажите, односно можноста да се натпреваруваат на истата патека, сепак, надоместокот, односно наградата не е ист за жените и мажите.

Таквиот пристап ниту е во согласност со спортскиот дух, но уште поважно не е во согласност со Законот за еднакви можности на жените и мажите каде меѓу другото децидно е наведено дека се забранува дискриминација врз основа на пол, во јавниот и приватниот сектор во многу области меѓу кои и во спортот! 

Ги охрабруваме организаторите навремено да ги променат критериумите за вреднување и наградите да бидат изедначени без разлика на полот. Доколку организаторот не постапи соодветно, ги повикуваме сите учесници (жени и мажи) и посетителите да го бојкотираат овој настан затоа што очигледно се базира на дискриминаторни политики и ја поттикнува родовата нееднаквост. Треба да бидеме свесни дека и во улога на учесници/посетители ние сме поддржувачи на ваквите дискриминаторни политики, поради што е клучно да покажеме зрелост и сплотеност. 

Истовремено ги повикуваме надлежните институции да реагираат согласно законските норми и прописи и да ги санкнционираат правните субјекти кои очигледно и јавно водат дискриминаторни политики и поттикнуваат родова нееднаквост.

Од,

Женска граѓанска иницијатива

АНТИКО