Со реализација на третата тродневна обука „Школа за мултикултурализам“ ( од 22 - 24 октомври 2011, во х. Алпина, Маврово ) на која земаа учество 19 млади лица од различна етничка припадност од РМ, ЖГИ АНТИКО продолжува со едукација и поттикнување на младата популација за вклучување во процесите на креирање и имплементација на акции, кои зближуваат и промовираат мир и соживот. Младите учесници имаа прилика да се запознаат со поимот култура и моделите на култура, вредности, стереотипи и идентитети, концептот на мир и конфликти и активизмот во мултикултурното општество.

Преку оваа обука, заснована на три основни делови – личен развој, тимска работа и вклучување во заедницата – фацилитаторките, Сехана Небиу и Ардита Зекири, со помош на презентации, практични вежби, употреба на визуелни средства и интеракција со младите, создадоа позитивно чувство на еднаквост, толеранција и разбирање помеѓу учесниците. Целта на Школата за мултикултурализам е да ги мобилизира младите во нашето мултикултурно општество за промовирање на позитивните цели и идеали за мир, толеранција, еднаквост, достоинство, човекови права, граѓански активизам и демократија. Како резултат на овие активности, младите ги зајакнаа своите капацитети за практикување на мултикултурализмот и стекнатите знаења и вештини ги применија во локалните заедници / организации од каде што доаѓаат.