ЖГИ АНТИКО во рамките на програмата „Жените и општеството“ континуирано работи и се залага за зголемување на учеството на жените во структурите на одлучување и воедно, ги поддржува и следи процесите на политичката партиципација на жените на локално и национално ниво. Во годишната програма на организацијата за 2011 планирани се активности со членови/ки на политичките партии кои веќе се имплементираат или се во фаза на подготовка, а тимот од извршната канцеларија дополнително спроведе родова анализа на кандидатските листи за Предвремените парламентарни избори 2011, на постигнатите изборни резултати и родова анализа на владините структури во министерствата.

Целта на спроведените истражувања беше да се процени напредокот во однос на изминатите години и да се добијат релевантни податоци кои понатаму би биле во функција на дискусиите и разговорите на настаните што се реализираат. Резултатите од анализите беа презентирани во рамките на тековните активности кои беа реализирани, но исто така се планира во месец септември да бидат соопштени на прес - конференција, да бидат дистрибуирани до сите релевантни политички субјекти и објавени на веб страната на АНТИКО. Согласно, заклучоците од анализите се предлагаат и соодветни активности и иницијативи за наредниот период.