Во просториите на Извршната канцеларија на ЖГИ АНТИКО на 19.02.2011-та година, се одржа евалуативна работилница со менторките на која присуствуваа и членки од мрежата на ЖГИ АНТИКО и дел од тимот на извршната канцеларија на АНТИКО. Вкупно беа присутни 13 учеснички. Во однос на менторската работа и вклучувањето на волонтерите во локалните организации, менторките истакнаа дека се задоволни од досегашната работа и дека ќе се потрудат и понатаму да ги анимираат веќе регрутираните волонтери, но и да привлечат нови волонтери со што би се зголемил и квантитетот и квалитетот на програмата.

Сите се согласија дека е особено важно да се поттикне иницијативноста на волонтерите со давање можност нивните предлози да се реализираат во пракса со поддршка на организациите и нивните тимови. Генерално, сите се согласија дека финансиите претставуваат исто така важен сегмент за реализацијата на програмата, бидејќи од една страна мотивацијата на волонтерите би се зголемила, а од друга страна финансиските ресурси го диктираат темпото и бројноста на самите активности со што и вклученоста на волонтерите би била поголема. Затоа, беше констатирано дека во наредниот период треба да се вложат напори од сите вклучени страни, за обезбедување на дополнителни буџетски средства што битно би влијаело тие да се развиваат и понатаму со тенденција да станат што повеќе одржливи и адекватни на потребите на волонтерите и организациите.