На тродневниот семинар на тема „Родовата перспектива во партиските политики“ кој се одржа во Струга, од 25 - 27.11.2011 година во организација на ЖГИ АНТИКО, 16 млади членови од политичките партии ВМРО-ДПМНЕ, СДСМ, СПМ, ДУИ, ДПА, ЛПМ, ПЦЕР и ДПСМ се стекнаа со знаења и вештини за препознавање на родовите концепти и потребата/можностите, за нивно вклучување во главните текови на општеството. Имајќи предвид дека младите активисти од политичките партии се идни креатори и имплементатори на партиските политики, за време на семинарот особено беше ставен акцент на заложбите и важноста на политичките субјекти во процесите на инкорпорирање на родовата перспектива во внатре-партиските политики и сите други сфери на јавниот и политичкиот живот. Учесниците се запознаа и со позитивните мерки за поголемо учество на жените во структурите на одлучување во политичките партии, на кандидатските листи и на сите други нивоа на одлучување.

 

Семинарот го спроведе Весна Јованова, консултантка за родови прашања и соработничка на АНТИКО. Таа ги поттикна учесниците да дебатираат и да ги изнесат своите ставови во врска со политичкото учество на жените. Како резултат на дискусиите произлегоа и неколку иницијативи кон чија практична имплементација ќе се пристапи во наредниот период.