На 01.11.2011 во просториите на општина Крушево, претставнички на жените од руралните средини вклучени во проектните активности имаа работна средба со градоначалникот на општина Крушево, г-дин Василчо Дамчески. На средбата присуствуваа и претставнички од ЖГИ Антико, локалниот тим и претседaтелката на Комисијата за еднакви можности при советот на општината. Градоначалникот накратко беше запознат со целите и планираните активности на третата фаза на проектот „Преку едукација и зајакнување кон социјално вклучување и активно граѓанство – III“, но и со постоечките проблеми кои во текот на реализацијата на првиот циклус работилници беа идентификувани од страна на жените. Тој нагласи дека општината е отворена за соработка и дека вложува напори да одговори на потребите на граѓаните, така што барањата на жените ќе бидат земени предвид како и во досегашната пракса. Исто така, градоначалникот истакна дека во голем дел проблемите му се познати и дека комуникацијата на жените со локалната самоуправа мора да биде континуирана заради консултации, размена на информации и предлози од аспект на изнаоѓање адекватни решенија за постоечките проблеми.  

Инаку, проблемите за кои стана збор и на кои ќе им се посвети повеќе внимание во наредниот период со цел подобрување на квалитетот на животот на жените од руралните подрачја во општината се однесуваат на: олеснување на пристапот до образование за девојчињата и подобрување на условите во училиштата, отворање на претшколски установи и изнаоѓање адекватни решенија за социјализација и образование на децата со посебни потреби, со што на мајките ќе им се помогне од аспект на усогласување на нивните обврски во семејството со работните обврски, намалување на невработеноста на жените, подобрување на пристапот на жените до услугите и сервисите за здравствена заштита.