Женска Граѓанска Иницијатива

Женската граѓанска иницијатива АНТИКО традиционално како и секоја година се приклучи кон Меѓународната кампања „Шестнаесет дена активизам против насилството врз жените“. Оваа година под мотото „НЕМА ОПРАВДУВАЊЕ ЗА НАСИЛСТВОТО!“ активистките и волонтерите/ките од мрежата на АНТИКО во Тетово, Гостивар, Куманово, Кичево, Ресен, Битола, Пробиштип, Струмица Крушево и Скопје, реализираа 20 јавни настани (трибини, работилници, тркалезни маси, јавни форуми, перформанси и дебати) и дистрибуираа 10.000 примероци промотивен материјал, со цел зголемување на јавната свест за насилството како општествен проблем и за потребата од енергична акција за превенција и справување со насилството.

Во Скопје, Гостивар, Ресен, Струмица и Кичево на 25.11.2011 се организираше прес-конференција за медиумите, на која се најави започнувањето на Кампањата и се даде осврт за состојбите во однос на насилството врз жените во Република Македонија.

Во рамките на кампањата особено се посвети внимание на сензибилизирање на младата популација во насока на формирање позитивни ставови по прашањата за родовата рамноправност и еднаквите можности, како и елиминирање на родовите предрасуди и стереотипи кај младите.

Препораките, кои што ЖГИ АНТИКО за времетраење на кампањата имаше можност да ги упати до граѓаните, надлежните институции и сите останати релевантни фактори во државата, беа фокусирани на неколку значајни компоненти кои придонесуваат кон поенергична борба против насилството врз жените :

- Зголемување на јавниот активизам на сите засегнати страни во борбата против ова општествено зло;

- Изнаоѓање и примена на ефективни начини за превенција и заштита на жртвите и нивна максимална поддршка во процесот на рехабилитација;

- Охрабрување на жртвите да го пријават насилството;

- Зголемување на интерсекторската соработка помеѓу релевантните институции;

- Имплементација во пракса на законската регулатива;

Кампањата заврши на 10 декември кога се одбележува и Меѓународниот ден на човековите права, со што се симболизира и врската помеѓу насилството врз жените и човековите права, односно насилството како чин на грубо кршење на човековите права и еден од најекстремните облици на дискриминација. По тој повод во десетте градови каде се спроведува кампањата, односно во централните градски подрачја, во институциите, училиштата и другите јавни објекти, се дистрибуираше промотивниот материјал од страна на активистките и волонтерите на ЖГИ АНТИКО.