Во општина Крушево на 12.10.2010 година се одржа претпоследната јавна дебата на тема “Креирање на локални политики за унапредување на положбата на жената”. На оваа дебата присуствуваа 15 учесници од релевантни структури и засегнати страни кои се директно одговорни за решавањето на постоечките проблеми од областа на родовата рамноправност и потребите на одредени категории на маргинализирани лица во општината. Дебатата ја фацилитираше г-ѓа Елена Грозданова, државна советничка од Секторот за еднакви можности, при Министерството за труд и социјална политика.

Фацилитаторката во своето излагање наведе неколку значајни аспекти во однос на Законот за еднакви можности на мажите и жените; спроведувањето на стратешките активности од Националниот план за акција за родова рамноправност (2007 – 2012), заштитата и превенција од секаков вид на насилство и дискриминација.

Јавната дебата предзивика голем интерес кај присутните и допринесе да се разменат информации и мислења, согледувања на тековните проблеми со кои се соочуваат, но и да се креираат идни политики кои ќе бидат во насока на подобрување на положбата на жената на локално ниво.

Дискусијата на дебатата овозможи да се идентификуваат корените на проблемите од родов аспект. Наведени беа  и неколку специфични проблеми со кои се соочуваат сите граѓаните/ките  на општина Крушево - незаконско конзумирање на алкохол од страна на машки и женски малолетни лица; непријавување на семејното насилство поради срам, осуда и неажурност на надлежните институции, како и проблемот со недостиг на здравствените институции - особено за заштита на репродуктивносто здравје на жените.

Како позитивен пример од спроведување на ваков вид на активности на Антико во заедниците е многу значаен постигнатиот резулатат како влијание на потпишаниот Меморандум за соработка помеѓу Антико и градначалникот на општина Крушево.

Градоначалникот оваа година организирал акција со обезбедување на бесплатен организиран превоз на жени од рурални средини, со цел да се реализираат превентивни гинеколошки прегледи на репродуктивните органи за благовремено да се дијагностицираат канцерогените заболувања, а и да се зголеми културата - навиките за превентивно лекување и изборот на матичен гинеколог.