Во општина Кисела Вода беше реализиран циклус од четири работилници на теми: „Основи на дискриминација“, „Институционална и правна рамка за родова рамноправност“, „Родово буџетирање“ и „Планирање и подготовка на локални акции“. Активно учество на циклусот од 4 работилници земаа 23 учесници, од кои 18 жени и 5 мажи. Што се однесува до етничката припадност, сите учесници беа македонци.

Општиот впечаток од спроведените четири работилници во општина Кисела Вода е дека родовите аспекти не се третираат со потребното внимание и дека постои слаба комуникација и консултации внатре во општината во однос на родовите прашања. Учесниците од општината особено нагласија дека во иднина ќе направат напори да ги пренесат знаењата до другите вработени во општината, а воедно и да го информираат градоначалникот. Покрај тоа, со оглед на фактот дека немаат изработено локален акциски план за родова рамноправност, учесниците истакнаа дека ќе се залагаат истиот да се изработи за 2012-та година во консултации со претставничките од ЖГИ Антико. Од страна на едукаторките им беше сугерирано дека треба да лобираат да се назначи координатор за еднакви можности во општината, бидејќи и законската регулатива ја пропишува оваа обврска на општината. По завршувањето на циклусот на работилници, договорено е средбите помеѓу претставниците од локалната самоуправа и ЖГИ Антико да продолжат и понатаму со цел да се дефинираат компонентите на акцискиот план и да се поттикне одредена јавна акција во општината од страна на учесниците на работилниците.