Женската Граѓанска Иницијатива Антико во рамките на својата годишна програма спроведува работилници со претставници од локалните самоуправи од општините на територијата на град Скопје кои имаат за цел да воспостават континуирана соработка и да дадат заеднички придонес во промовирањето и унапредувањето на родовата рамноправност, а со тоа и кон ефективната примена на законската регулатива. ЖГИ Антико смета дека соработката со Единиците на локалната самоуправа е од особена важност, бидејќи токму во локалните заедници непосредниот контакт со граѓаните овозможува да се мапираат нивните приоритети и потреби, и истите да се инкорпорираат во локалните програми и планови за работа.

Оттука, во општина Сопиште се одржаа 4 работилници каде што беа опфатени темите: основи на дискриминацијата, лобирање и застапување, прибирање на родово распределени податоци и родова анализа и родово буџетирање. Активно учество во работилниците земаа вкупно 11 претставници – од образовните институции (4) и од општината (7 – градоначалник, претседателка на КЕМ, координаторка за еднакви можности, аналитичар, претставник од финансиско одделение, административни работници).  

На едната од работилниците присуствуваше и градоначалникот на општината кој ја поддржа соработка на општината со граѓанските организации и изрази подготвеност да ги поддржи активностите на КЕМ со одредени финансии од општинскиот буџет во рамките на можностите на општината. Групата, пак, која учествуваше беше особено активна во дискусиите на сесијата за прибирање на родово распределените податоци. Присутните претставници од образовните институции истакнаа дека редовно ги ажурираат статистичките податоци и дека располагаат со родово разделени податоци кои по потреба ги доставуваат до општинската власт. Од друга страна, координаторката за еднакви можности спомена дека прибирањето на податоци во одделни сектори е проблем поради немањето на кадар и финансии да се спроведе потребното истражување.

Од сите четири одржани работилници произлегоа заклучоци кои се од особена важност за увидувањето на потребите и овозможувањето на понатамошна едукација на администрацијата и сите други инволвирани страни во развојот на единиците за локална самоуправа. Некои од поважните заклучоци се следните:

- постоење на недоволна информираност и едуцираност на субјектите во општината за контакт центрите и правните застапници за заштита и превенција од дискриминација;

- во однос на насилството врз жените како еден од најсуровите облици на дискриминација, учесниците истакнаа дека е потребна едукација од најмала возраст (да бидат застапени ваков вид на програми во образовниот процес), со цел да се превенира појавата на предрасуди и стереотипи кои понатаму водат кон дискриминаторско однесување и насилство;

- потребата од постоење на родово разделени статистички податоци и родова анализа која ќе им помогне полесно и сеопфатно да ги креираат активностите и програмите на кои работат;

- стекнатите знаења, учесниците особено ќе ги искористат во напорите Комисијата за еднакви можности да обезбеди средства за спроведување на локалниот акциски план и да издејствува отворање на гинеколошка амбуланта и детска градинка во општината, затоа што непостоењето на институции од ваков вид во општината, го наведоа како голем проблем на кој треба да му се посвети внимание.