Женската граѓанска иницијатива Антико на 14.12.2010 година во х. „Континентал“ Скопје, организираше конференција на тема “Младите и мултикултурализмот - како го чувствуваме духот на мултикултурализмот“  со цел, да ги поттикне младитe лица - студенти од Универзитетите на Македонија, претставници од младинските граѓански организации, претставници од младинските форуми на политичките партии и други засегнати страни да создадат отворен и сигурен простор за меѓуетничка интеракција – да споделат мислења, искуства, ставови за културните предизвици, како и практичните решенија за развојот на мултикултурното општество.

Во рамките на „Програмата за млади“ како дел од Годишната програма на Женската Граѓанска Иницијатива Антико, досега се реализирани различни активности за анимирање на помладата популација за да ги запознае различните култури, системи на вредности, како и постоечките сличности, вклучувајќи и прифаќање на различностите.

Преку Школата за мултикултурализам, иницирана и спроведена од страна на ЖГИ Антико, се поттикнуваше младинскиот активизам во процесот на развој на мултикултурализмот, изградба на мирот, зајакнување на дијалогот и меѓусебно поврзување и вреднување.

 

Младите учесници на конференцијата, покажаа добра волја и подготвеност да го прифатат мултикултурализмот како дел од нашето секојдневие. Воедно, укажаа и на бариерите и проблемите со кои се среќаваат во нивните средини, а кои пред се засновани на:

- предрасуди и стереотипи

- неразбирање и непознавање на различните ентитети и вредностите кои тие ги негуваат

- гетоизација во одредени локални средини и недоволна комуникација со останатите припадници на заедницата

- недостиг на политичка волја за надминување на постоечките слабости

Препораките кои произлегоа како резултат на конструктивната дискусија и практичните примери на учесниците акцентираат неколку клучни сегменти на кои треба да се обрне внимание со цел подобрување на практичната имплементација на мултикултурализмот:

- преиспитување на сопствените вредности и ставови, и критички осврт кон себе и случувањата во непосредната околина

- поголема солидарност, разбирање и толеранција на различностите

- зајакнување и почитување на воспоставените механизми за практична имплементација на мултикултурализмот

- едукација во семејството и образовниот процес од најмала возраст

- комуникацијата и дијалогот треба да бидат основни средства за приближување на заедниците

- позитивните иницијативи и вредности треба да се промовираат, преку проширување на мрежата на нивни поддржувачи и имплементатори