По повод започнувањето на Меѓународната кампања „16 дена активизам за борба против родовото и семејното насилство“ во организација ЖГИ Антико и на нејзините локални членки, од 25.11.2010 до 10.12.2010 година на територијата на Република Македонија ќе се одржат 20-тина активности кои ќе опфатат теми од ова зло на 21 – от век.

Овие активности ќе се одржат во 10 локални заедници (Скопје, Тетово, Гостивар, Кичево, Дебар, Битола, Ресен, Струмица, Пробиштип и Куманово) опфаќајќи ги сите делови на Р. Македонија. Во активностите учество ќе земат претставници од надлежните институции (центрите за социјална работа, МВР, здравствените институции, судството, образованието), НВО кои работат на оваа проблематика и, се разбира, поддршка од медиумите. Овие активности најмногу се насочени кон сензибилизирање на младата популација (ученици од основно и средно образование) во насока на препознавање на насилството и активно учество во заложбите за негово надминување. 

За оваа цел беа одржани и прес - конференции во Тетово, Ресен, Скопје и Струмица, а во останатите локални заедници на медиумите им беше поделено соопштение кое на истите беше објавено.

Во Тетово на 01.12.2010 беше одржана трибина во основното училиште „Братство - Миѓени“ со ученици албанци од 7-мо и 8-мо одделение, а на 03.12.2010 година беше одржана трибина со ученици од 7-мо и 8-мо одделение од македонска националност од основното училиште „Кирил и Методиј“.

На 03.12.2010 и 06.12.2010 година во Куманово се одржаа две работилници кои ги опфатија младите од Средното медицинско училиште.

Едукативна работилница со 20 млади од средното медицинско училиште на тема „Насилството кај младите“ се одржа на 30.11.2010 година во Гостивар. Во овој град на 07.12.2010 година беше одржана и втора едукативна работилница на истата тема, но овојпат со учениците од Средното економско училиште. На 08.12.2010 година се одржа и тркалезна маса со претставници од МВР, судот и центарот за социјална работа Гостивар на тема „Како законот не заштитува од семејното насилство“. Во периодот од 25.11.2010 до 10.12.2010 година се емитуваше и видео спот на локалната ТВ Кисс.   

Во Кичево на 01.12.2010 и 02.12.2010 година беа одржани две работилници со учениците (од албанска и македонска националност) од 8-мо одделение во основното училиште „Санде Штерјоски“.

Јавна дебата со претставници од надлежните институции, како и претставници на НВО секторот, беше одржана на 02.12.2010 година во Ресен. Исто така, ќе биде одржана и работилница со жените од руралните средини за препознавање на насилството и мерките за заштита.  

Во градот на конзулите, Битола, по повод оваа Кампања беа одржани две трибини. Првата трибина се реализираше на 09.12.2010 година со учениците од 3-та и 4-та година од средното училиште „Кузман Шапкарев“, но учество земаа и младите од училиштето „Таки Даскалот“. Втората трибина се одржа на 10.12.2010 година во село Добрушево со ученици од 7-мо и 8-мо одделение од основното училиште „Браќа Миладиновци“. 

На 29.11.2010 година во Пробиштип беше одржана трибина со лица од јавните институции - здравство, образование, Комисијата за еднакви можности, Центарот за социјална работа, МВР и невладиниот сектор. Во ДСУ „Наум Наумовски Борче“, пак, на 06.12.2010 година беше одржана работилница со средношколците. 

Трибина со ученици од средното училиште „Здравко Чочковски“ беше одржана на 03.12.2010 година во Дебар. Истиот ден, беше одржана и трибина со ученици од 7-мо и 8-мо одделение од основното училиште во Дебар.

Во главниот град на Р.Македонија, Скопје, на 03.12.2010 година беа одржани две работилници во основното училиште „26 Јули“ во општината Шуто Оризари. На првата работилница учесници беа учениците од 8-мо одделение од ова училиште, а на втората наставниците од истата институција. 

Во сите 10 локални заедници на територијата на Република Македонија кои беа дел од Кампањата „16 дена активизам за борба против родовото и семејното насилство“ на 09.12.2010 година беше одржан јавен перформанс на кој беше поделен едукативниот и промотивен материјал (флаери и лифлети).