Врз основа на потребите и интересот на жените од руралните средини беше спроведена и втората локална акција во општина Крушево насловена како "Женското образование во 21-от век". Оваа локална акција имаше за цел освестување и зајакнување на жените од руралните средини за што поголема нивна вклученост во образовниот процес, надоградување на знаењата и поголема нивна информираност. 

Како првична активност која беше реализирана е истражувањето на прашања од аспект на образованието на жената од руралните средини - причините, проблемите и потребите во однос на ова прашање. Анкетирани беа вкупно 100 жени од селата Борино, Саждево, Белушино и Јакреново со што се овозможи врз основа да добиените информации подготовка на анализа.  Анализата беше публикувана во промотивните материјали – брошури во 1400 примероци на два јазици (македонски и албански) и беше дистрибуирана во општината.

Организирани беа 4 едукативни работилници на тема неформално образование, алфабетско и фукционало описменување каде во улога на едукатор беше ангажиран професор. Интересот кај жените беше голем за што говори и присутноста на вкупно 71 жена во текот на сите работилници. 

Во текот на реализација на локалната акција се одржа средба со градоначалникот на општина Крушево и претставници од УНИФЕМ, МТСП – секторот за еднакви можности и ЖГИ Антико. На средбата беше потпишан Меморандум за соработка помеѓу ЖГИ Антико и општина Крушево кој ќе допринесе за меѓусебна поддршка и понатамошна идна соработка во однос на унапредување на положбата на жената. Воедно од страна на жените од руралните средини во општина Крушево до претставниците на Локалната самоуправа беше доставен и Манифест во кој јасно се наведени најзначајните потреби на овие жени.

Трибината  "Женското образование во 21-от век" поттикна интерес кај жените, мотивација и иницијативи за продолжување на нивното образование. Според анализата, жените од руралните средини во основа сакаат да го продолжат своето образование, но потребно е да имаат обезбедено услови, или да добијат позитивен одговор и поддршка од нивните семејства.

Овој начин на вклучување на жените од руралните средини во општествените текови и организирање на активности во локалните акции е позитивно прифатено, како од страна на жените, така и од страна на локалната самоуправа.